[香港] Carousell處理交易爭議流程概覽
處理交易爭議
如果你透過Carousell平台提出同買家保障有關嘅交易爭議，並且你同意遵守呢啲條款，咁呢啲條款將適用於你。
喺爭議期內只可以提出1次交易爭議。買家有責任確保喺提交交易爭議之前檢查並清點訂單中嘅所有產品。
爭議期
作為買家，一旦產品已經喺運送途中或者安排咗面交，你將會見到退貨/退款嘅選項。我哋鼓勵你聯絡賣家，以澄清訂單嘅任何問題。
請留意可以提出交易爭議 / 訂單由系統自動標記為已完成之前嘅時間表：
- 可追蹤運輸：運送日期後2日
- 不可追蹤運輸（例如：運送狀態唔會顯示喺Carousell app內嘅）：最長運送日期後5日
- 面交：確認面交日期後9日（賣家需要撳「確認面交」）
如果買家已經撳咗「已收取訂單」或者訂單已經根據上述嘅時間標記為已完成，將唔會再接受退貨/退款申請。
資格
交易爭議原因
只能夠因以下原因而提出交易爭議：
- 產品同描述明顯不符
- 冇收到*用咗可追蹤運輸**嘅產品
*冇收到產品係指賣家未能夠根據所選擇嘅運送方式送貨嘅情況。
**建議賣家選擇可追蹤運輸。你可以喺呢篇文章搵到我哋提供可追蹤運輸嘅快遞合作夥伴列表：具有app內追蹤嘅快遞公司列表。
更多有關Carousell退款政策嘅詳細資料，歡迎參考呢篇文章。
Carousell支援
收到交易爭議之後，Carousell將喺24小時內聯絡雙方，以建議後續步驟。
根據提交嘅初步證據，Carousell可能會聯絡任何一方以獲取更多資料*，以進行調查並達成解決方案。
*為咗促進解決交易爭議嘅過程，Carousell可能會要求買家/賣家喺規定嘅時間內透過電郵提供支援文件。如果冇咁樣做，將導致交易爭議被裁定為不合規嘅一方敗訴。建議買家/賣家喺任何交易爭議期間定期檢查電郵，並喺規定嘅截止日期前回覆。
Carousell致力喺提出交易爭議後嘅5個工作日內作出決議結果。但係如果需要退貨，成個解決過程可能需要5個工作日以上。
同時，呢筆款項將由Carousell安全保管，直到交易爭議解決。
Carousell支援嘅交易爭議解決流程
產品同描述明顯不符/收到錯誤產品
取決Carousell嘅決定，如果索賠被認為有效，則可以規定退款（全額或部分）或者退貨並退款。Carousell唔會對因為延遲到自提點提取產品而產生嘅額外每日存倉費進行退款。
產品唔完整
取決於Carousell嘅決定：
- 賣家可能會被要求向買方運送返缺少嘅零件，或者可能需要採取其他措施從而使產品或訂單完整；或者
- 可能會規定退款（全額或部分）或者退貨並退款。
對於上述情況，賣家將負責並承擔額外嘅運費，並直接付款畀買家。
冇收到產品
對於訂單冇送達嘅情況，買家保障並唔涵蓋以不可追蹤運送（由無法識別嘅快遞公司自行運送）作為運送方式嘅訂單。要針對訂單冇送達提出索賠，買家必須選擇可追蹤運輸。
運送賠償涵蓋範圍
- 使用Carousell官方合作快遞合作夥伴（順豐寄貨及自取點攞貨）：Carousell將會聯絡我哋嘅快遞合作夥伴，代表賣家取得賠償（以Carousell官方合作快遞合作夥伴所規定嘅保險承保限額作為上限，更多詳情歡迎參考呢篇文章）。
- 冇使用Carousell官方合作快遞合作夥伴（自訂快遞公司）：賣家必須自行聯絡相關嘅快遞合作夥伴以取得賠償。以快遞合作夥伴所規定嘅補償金額作為賠償額嘅上限。強烈建議賣家提供足以涵蓋所寄出產品價值嘅運送方式。
賣家有責任確保佢哋寄出嘅產品符合所選擇嘅快遞公司嘅包裝指引同服務條款，包括喺有需要時符合資格獲得相關嘅賠償。
為避免疑義，Carousell唔會對遺失嘅包裹進行賠償。喺任何情況下，Carousell都唔會對遺失或未送達嘅產品提供任何賠償。喺適用嘅情況下，Carousell嘅義務僅限於促進賠償索賠要求。
如果冇收到任何產品，將對該產品進行全額退款，包括運費以及該產品收取嘅其他費用。
Carousell支援嘅交易爭議解決方案
退款並退貨流程
如果決議結果當中包括需要退貨，買家同賣家必須喺決議結果後嘅7日內安排退貨。買家必須按照呢篇文章（[香港] 買家教學：點樣全額退款及退貨？）所寫嘅步驟，透過app完成退貨流程。
賣家必須喺app內提交退貨地址並且追蹤退貨進度。更多詳情，歡迎參考呢篇文章：[香港] 賣家教學：裁定全額退款及退貨之後需要做啲咩？
如果產品喺退貨過程中因包裝不當而損壞，Carousell保留係咪仍向買家退款嘅決定權。
請注意，任何退款嘅實際處理同結算將由Carousell授權嘅第三方付款合作夥伴單獨進行。雙方進一步同意並承認，授權嘅第三方付款合作夥伴係負責所有付款處理服務（包括喺平台上進行嘅任何退款）嘅締約方。