常見詐騙手法及安全建議 [香港]

喺Carousell上買賣時，記得留意以下騙案手法，時刻提高警覺，以免誤墮騙徒陷阱。 我哋會定期更新以下安全貼士建議，分享買賣時需要留意嘅地方。

如果你有發現可疑帳戶，請回報畀我哋。

• [🥮 2022年8月] 臨近中秋節，買月餅 / 月餅禮券時記得要小心！我哋強烈建議你只向已驗證、具評價，及較多賣嘢經驗嘅賣家購買。可以的話，盡量選擇面交。
• [2022年7月] 如果你係以下用戶，記得多加留意： 
  • 想購買家俬嘅買家 - 我哋留意到有騙徒會使用新帳戶，刊登含有空白描述嘅家俬產品。騙徒會建議買家轉至其他方式聯絡，並於收款後失去聯絡。記得只將你嘅對話保留於平台內！
  • 賣家 - 有騙徒使用新帳戶聯絡賣家，表示想透過郵寄方式購買物品。好多時候騙徒會嘗試引領賣家轉至其他方式聯絡，並要求賣家點擊假冒Carousell嘅網站輸入個人資料。請留意，香港Carousell目前並不支援Carousell Protection，亦不會要求你在任何網站上提供個人資料。如想了解更多關於聲稱來自Carousell嘅釣魚電郵及可疑網站嘅貼士，請按此閱讀。
  • 賣家 - 慎防有上升趨勢嘅支票詐騙。當買家透過銀行轉帳付款時，我哋強烈建議你立刻檢查銀行帳戶，確保轉帳金額即時出現於戶口可用結餘內。如果你選擇面交，盡量避免接受支票付款。 

• [2022年3月] 隨住學校提早放暑假，我哋留意到有關遊戲帳戶騙案數量有所上升。購買遊戲帳戶或虛擬物品時，切記提高警覺。記得檢查賣家過去是否有良好嘅買賣紀錄，並盡量避免立即付款，以保障自己。
  
  
• [2022年2月] 購買Airpods時，切記提高警覺。有騙徒會使用新帳戶，聲稱Airpods為公司抽獎獎品、或各種原因而不再需要。騙徒只會接受郵寄產品，並會於收款後失去聯絡。
  
  
• [2022年1月] 如果賣家係新帳戶，帳戶名稱為亂碼 (例：hdhdhshjd)，請提高警覺。騙徒通常售賣產品包括：即影即有相機、玩具、貨幣兌換服務等等。騙徒通常會要求買家透過支付寶 (Alipay)付款，並於收款後失去聯絡。
  
  
• [2021年11月] 切勿因賣家為長期用戶以掉以輕心！有騙徒會使用舊帳戶，假裝願意面交，但會以各種藉口取消面交，而建議買家使用速遞。騙徒過往售賣產品包括：電子產品 (例: kindle、logitech、VR headset)、主題樂園門票、玩具等。收款人姓名通常為非本地，或罕有姓氏 - 例如JIANG、ZHANG、XIU等。
  
  
• 購買名牌時，如果產品為全新，聲稱正貨，但價錢比市價低好多，而賣家又為新帳戶，咁就必需提高警覺，了解多啲先好決定付款。